Programdetaloj

Skizo	Tutmondaj Novaĵoj (kunlaboro de Robert Poort kaj Andrej Peĉënkin) - 2020-02-15
Permesilo
Aŭskultu
Teksto	Pluvegoj kaj inundoj estingas brulegojn en Aŭstralio: aŭtoritatoj en Aŭstralio diras ke grandaj pluvoj povus estingi ĉiujn brulegojn en Novsudkimrio antaŭ la semajnfino. Iuj partoj de orienta Aŭstralio ricevis la plej abundajn pluvegojn depost pli ol 30 jaroj. Aŭstralio estas tero de ekstremoj. Iuj urboj pasis de sekeco ĝis inundo pro granda pluvo falinta en Novsudkimrio kaj Kvinslando. Iuj terkultivistoj spertinte sekecon ricevis siajn plej bonajn pluvojn depost jardeko. Krizaj aŭtoritatoj avertis pri subitaj inundoj minacantaj la vivon. La plej granda urbo de Aŭstralio, Sidnejo, malsekiĝas per preskaŭ 400 mm da pluvo falinta de vendredo. Tiu kvanto kutime falas dum kvar monatoj. Oni prognozas pliajn pluvegojn pli malfrue ĉi-semajne. (Raporto de Vikinovaĵoj) Turkio ne permesas la usonan planon minaci pacon en Mez-Oriento: lunde, la 10-an de februaro (2020) turka prezidento Erdoğan [ˈæɾdo(ɰ)ɑn] diris, ke Turkio neniam permesos, ke Usono minacu pacon en la regiono, per sia tiel nomata "Traktato de la Jarcento". Erdoğan diris, ke la interkonsento, kiu deklaris Jerusalemon la ĉefurbo de Israelo, estas nenio alia ol "revo", kiu minacas pacon en la regiono, kaj Turkio ne permesos realigi ĉi tiun revon. Li diris, "Ni ne agnoskas ĉi tiun planon, kiu signifas aneksadon de palestinaj teroj, detruas Palestinon kaj komplete okupas Jerusalemon. Ni neniam akceptos ĉi tiun intencon, kiu akceptas duŝtatan solvon surface, sed signifas leĝigon de la israela okupado sub la mandato de la usona registaro." Antaŭ tio, Ankaro deklaris mortnaskita la planon, kiu estis anoncita de usona prezidento Donald Trump fine de januaro por ĉesigi la konflikton inter Israelo kaj Palestino. (Raporto de ĈRI) Gajni batalon kontraŭ la kron-viruso: Ĉina Prezidento Xí Jìnpíng [ɕǐ tɕìn.phǐŋ 习近平], lastatempe emfazis, ke ju pli peniga estas la klopodo preventi kaj regi la epidemion de nova kron-viruso, des pli grava estas la persisto en laŭleĝa agado. Li prezentis postulojn pri leĝdono, leĝplenumo kaj juĝado. Tiuj konkludoj plene spegulas la ideon de la ĉina reganta partio pri ĉiuflanka laŭleĝa regado, kio sendube helpas altigi la kapablon de la agado kontraŭ la epidemio kaj liveras fortan garantion pri regado por batali kontraŭ la epidemio. Ĉinio estas jura ŝtata. Persisto en ĉiuflanka laŭleĝa regado estas evidenta avantaĝo de la ŝtata rega sistemo de Ĉinio kaj ankaŭ grava en la reago al okazaĵoj koncernaj al publika sano. En la lastaj jaroj Ĉinio intensigis la leĝdonon pri medicina kaj sanzorga kampoj. (Raporto de ĈRI)