Skizo | Tutmondaj Novaĵoj (kunlaboro de Robert Poort kaj Andrej Peĉënkin) - 2020-05-03 |
Permesilo | ![]() |
Aŭskultu | |
Teksto | Malegaleco en socia distanciĝo: jaŭde, la 30an de aprilo (2020), en intervjuo kun la novaĵ-agentejo Demokratio Nun, franca ekonomikisto Thomas Piketty diris, ke la nuntempa krizo estas ebleco "ŝanĝi vidpunkton pri tio, kion ni devas fari pri la ekonomio, pri kiel ni devas organizi niajn sociojn, kaj ... pri la nivelo de malegaleco." Li diris: "La unua videbla efiko de la krizo estas, ke ni vidas la perforton de socia malegaleco. Sciu, homoj ne egalas rilate al socia distanciĝo, ili ne egalas pri senlaboreco, pri perdo de enspezo. Iuj homoj havas tre malgrandan hejmon aŭ tute ne havas hejmon –ili estas senhejmaj, estas en tre malsama situacio ol homoj, kiuj estas enfermitaj en sia bela apartamento aŭ bela domo”. Thomas Piketty diris tion, kaj aliajn interesajn rimarkojn, en intervjuo pri sia nova libro Kapitalo kaj Ideologio. (Laŭ raporto de Demokratio Nun) Funebro en Usono: merkrede, la 29an de aprilo (2020), laŭ funkciuloj kaj specialistoj de publika sano en Usono, Covid-19 mortigis pli da usonanoj ol la milito en Vjetnamio. Laŭ la datumoj kompilitaj de la universitato Johns Hopkins kaj la usonaj fakuloj de la sansistemo, en Usono la mortintoj jam pasis la nombron pli altan ol la 58 mil usonanoj forpasintaj en la milito de Vjetnamio, laŭraporte de la televida ĉeno Hispan-televido. La kontaĝitoj duobliĝis dum la lastaj 3 semajnoj kaj reprezentas trionon de ĉiuj infektoj de la pandemio en la mondo. Tamen, oni kredas ke la reala nombro da kontaĝoj kaj mortintoj estas multe pli granda ol la raportitaj, kaj Vaŝingtono kaŝas la veron al la usonanoj pri la kronviruso. La funkciuloj de la sektoro avertas, ke la manko de materialoj necesaj kaj taŭgaj laboristoj limigas la pruv-kapablon. Spertuloj pri publika sano atentigis, ke forigi la limigojn pri socia distanciĝo antaŭtempe povus provoki kreskon de novaj kontaĝoj, kaj alarmigis pri tio, ke la lando povus alfronti duan ondon de la viruso fine de la jaro. (Laŭ raporto de Maritza Gutiérrez González) La kronviruso trafis ortodoksajn ekleziulojn: lundon, la 27an de aprilo (2020), en Monaĥejo en Kievo, apartenanta al la Ukraina Ortodoksa Eklezio (de Moskva Patriarkeco), ĉiuj sacerdotoj kaj multaj monaĥoj, studentoj kaj instruistoj de la Kieva spirita akademio, infektiĝis je la kronviruso, kaj tri el ili mortis. La monaĥejestro Pavel alvokis la kredantojn zorgi ne pri la viruso, sed pri sia animo. Tamen, la konsilio de la Ukraina Ortodoksa Eklezio alvokis la kredantojn "ne ignori ĝeneralajn higienajn normojn kaj sekvi kuracistajn rekomendojn". Ankaŭ en Rusio la eklezia estraro agnoskis realon de la danĝero. La 29an de marto la patriarko alvokis la kredantojn malobei "neraciajn pastrojn", kiuj malobservas la limigojn kaŭzitajn de la kronviruso. (Laŭ raporto de Vikinovaĵoj) |