Programdetaloj

Skizo	Tutmondaj Novaĵoj (kunlaboro de Robert Poort kaj Andrej Peĉënkin) - 2020-12-21
Permesilo
Aŭskultu
Teksto	Tutmonda kunlaboro kontraŭ la epidemio: vendrede, la 18an de decembro [2020], la ĝenerala sekretario de UN António Guterres alparolis la germanan federacian parlamenton, alvokante, ke la tuta mondo kunlaboru por batali kontraŭ la epidemio, kaj kondamnante falsajn informojn damaĝantajn tutmondajn klopodojn kontraŭ la epidemio. António Guterres diris, ke de post la fondiĝo de UN neniu alia defio estas pli grava ol la kronvirusa epidemio, kaj la mondo suferas la plej seriozan ekonomian krizon post la Dua Monda Milito. En multaj lokoj aperis tendenco de izolismo, nur monda kunlaboro helpos nin venki la epidemion. António Guterres ankaŭ diris , ke krom la kronviruso ekzistas ankaŭ la "viruso" de falsaj informoj. Senbride plivastiĝis falsaj informoj, diversaj misfamoj kaj komplotaj diraĵoj dum la kronvirusa epidemio. UN surbaze de scienco kaj fakto starigas la fidon de homoj je la senvirusiga laborado. Parolante pri vakcino kontraŭ la kronviruso Guterres diris, ke vakcino devas esti publika produkto akirebla kaj kostelportebla por ĉiuj homoj de la mondo. (Laŭ raporto de Ĉina Radio Internacia) Hungario malobservas eŭropan juron: ĵaŭde, la 17an de decembro [2020], Hungario estis kondamnita de la justica kortumo de Eŭropa Unio pro ties malobservo de la eŭropa juro koncerne azilon pro la efektivigo de "transitejoj” ĉe sia landlimo kun Serbio. La justica kortumo de EU opinias, ke la azilpetantoj estas detenitaj en la transitejaj kampoj sen valida kialo kaj en majo 2020 postulis liberigi ilin. (Laŭ raporto de Neniam Milito Inter Ni) Tutmonda rekordo de rifuĝintoj: ĵaŭde, la 10an de decembro [2020], la Alta Komisiito de Unuiĝintaj Nacioj pri Rifuĝintoj, Filippo Grandi deklaris, ke la mondo bedaŭrinde atingas "gravan turnopunkton" kaj avertis, ke la situacio pligraviĝos, se "la estroj de la mondo ne haltigos la militojn". "La internacia komunumo ne sukcesas antaŭgardi la pacon", li diris substrekante, ke la trudataj delokitoj duobliĝis dum la lasta jardeko. La nombro de rifuĝintoj kaj delokitoj en la mondo superis 80 milionojn meze de la jaro 2020. Tio estas rekordo, kaj la nunaj kaj novaj konfliktoj, kiel ankaŭ la nova kronviruso, havas katastrofajn sekvojn al ilia vivo. (Laŭ raporto de Neniam Milito Inter Ni)