Programdetaloj

SkizoInteralie - pozitivaj novaĵoj, elsendo 57
PermesiloCC-BY-SA 3.0
ProduktantoMuzaiko
Aŭskultu
TekstoVia aŭto rekonos vin laŭ via vizaĝo;
Nova atingo surkampe de perreta sendo de odoroj;
Google kaj Microsoft interkonsiliĝas kun dekjaraĝa geniulino.

Saluton, karaj geamikoj! Nun vi aŭskultas la 57-n elsendon de la programero Interalie. En la studio por vi laboras Kirill Noviĉenko.

Rusia kompanio VisionLabs ellaboris sistemon por aŭtoj, kiu rekonas la vizaĝon de kondukisto. Eblos malfermi vian aŭton same facile, kiel malbloki vian saĝtelefonon kaj eĉ pli. La sistemo de vizaĝrekono de VisionLabs anstataŭigos ŝlosilon, kaj via aŭto rekonos vin kaj kiam vi alproksimiĝos, la sistemo konfirmos viajn kondukistajn rajtojn kaj malfermos la pordojn, komunikas la agentejo TASS.
Ĉi tiu nova sistemo por aŭtoj nomiĝas LUNA. La ellaboristoj el la teknologiurbeto Skolkovo adaptis ĝin por labori kun Nvidia Drive IX.
Krom senŝlosila eniro kaj konfirmo de kondukistaj rajtoj la sistemo observas la situacion ene de la aŭto. Kiel klarigas la ellaboristoj, tio ebligos kontroli la staton de la kondukisto.
La ĉefdirektoro pri programaro kaj estro de la platformo Drive IX de Nvidia Ratin Kumar certas, ke artefarita intelekto ŝanĝos la aliron de aŭtoproduktantoj al kondukado de aŭtoj. La unuaj paŝoj al kreo de novgeneraciaj transportiloj estas jam faritaj.
La sistemoj de vizaĝrekono laŭgrade iĝas neevitebla parto de la vivo en moderna socio. Tamen ĝia vasta disvolviĝo timigas ne nur rajtoprotektistojn, sed ankaŭ la estrojn de IT-gigantoj.
Limigon de aplikado de tiu ĉi populariĝanta teknologio subtenas la estroj de Apple, Facebook kaj Amazon. La prezidanto de la Jura Departemento de Microsoft eĉ estas tute certa, ke sen ŝtata interveno ne eblos eviti malbonuzadon de la vizaĝrekona sistemo.
Laŭ opinio de profesoro Ŭudroŭ Harcog el la Nord-Orienta Universitata Kolegio pri Komputilaj Sciencoj, la homaro devas malpermesi ĉi teknologion antaŭ ol estos tro malfrue. Aliokaze ĝi iĝos ideala ilo por tiranio, ĉar estas plej malfacile ŝanĝi aŭ kaŝi la vizaĝon.
-------
Sciencistoj demonstris disponaĵon, kiu per elektrodoj sendas al la cerbo signalojn pri odoroj. Esploristoj opinias, ke ĉi tiu teknologio taŭgos por sistemoj de virtuala kaj pliigita realeco kaj ankaŭ uzeblos en kuracado.
Modernaj teknologioj kapablas sukcese transdoni per Interreto diversajn informojn, sed transdono de odoroj restas malfacila tasko. Sciencistoj de la Inĝeniera Instituto de Malajzio asertas, ke ili ellaboris la disponaĵon, kiu ebligos al homoj flari la samajn odorojn.
Foje por transdoni odorojn oni uzas rezervujetojn kun odorantaj substancoj. Sed Malajziaj sciencistoj sukcesis tion fari nur per elektro. Por tio ili metas elektrodojn en la nazon de homo, kaj per ili transdonas cerben “ciferecajn odorojn”.
La esploristoj tamen konfesas, ke nur ĉiu kvara partoprenanto de la eksperimento reale sentis la kreitan de komputilo virtuala odoro. La flarantoj priskribas la odorojn per malprecizaj vortoj kiel “frukta”, “dolĉa” aŭ “kemia”. La eksperimenton partoprenis 31 homoj.
Tio estis nur la unua testado de la koncepto de “ciferecaj odoroj”, rimarkas unu el la aŭtoroj de la ellaboraĵo Karun Karunanajaka. Li konfesas, ke la partoprenantoj malŝatis la senton de elektroda tubeto naze. “Multaj homoj volis partopreni, sed post la unua provo ili rifuzis plu partopreni, ĉar ne povis elteni tion,” - rakontas la sciencisto.
La ĉefa demando estas, ĉu la teknologio de “cifereca odoro” havas estontecon sen bezono enmeti elektrodojn en la nazon? Krome ne estas klare, ĉu eblas transdoni cerben pli konkretajn signalojn pri odoro. En la estontaj eksperimentoj la sciencistoj planas ekuzi magnetoresonancan tomografion.
-------
Samajra Mehta estas dekjaraĝa knabino, kiu pasigis sian infanecon en la Silicia Valo kaj jam iĝis tie vera sensacio danke al sia talento pri programado. Malgraŭ sia malgranda aĝo ŝi jam fondis la kompanion CoderBunnyz, kiu ricevis agnoskon federalnivele. Nun Samajra elpaŝas en konferencoj pri programado kaj gvidas kursojn por geinfanoj.
Ŝi komencis programi ekde sia aĝo de ses jaroj kaj estante okjaraĝa ŝi elpensis tabloludon CoderBunnyz por instrui programadon al sia frato. Pro la ideo ŝi ricevis la premion 2500 dolaroj kaj la duan lokon en la konkurso Think Tank Learning’s Pitchfest en la jaro 2016. Pri la knabino oni komencis fari novaĵrakontojn kaj ŝia tabloludo aktive estas vendata rete.
Nun Samajra daŭre gvidas seminariojn en la Silicia Valo, kiujn vizitis jam 2000 geinfanoj. Parto de la seminarioj okazis en la ĉefoficejo de Google, post kio la kompanio proponis al Samajra labori tie post kiam ŝi finos la kolegion. Sed Samajra rifuzis, celante iĝi entreprenistino, ja ĉion necesan ŝi havas. Ankaŭ ŝi estis invitita al Microsoft por prelegi tie.
Nun Samajra lanĉis projekton, kadre de kiu ŝi intervjuas interesajn homojn, agantajn en teknologiaj, klerigaj kaj ludaj kampoj. La monon enspezitan pro vendado de sia tabloludo ŝi investas en produktado de aliaj ludoj kaj al bonfara fonduso, celanta helpi senhejmulojn.

Post tiaj rakontoj mi sentas min stultulo, kiu povas programi nur iom pli ol “Saluton, Mondo!”. Por reĝojigi min, bonvolu sendi viajn ideojn kaj proponojn al la adreso interalie@muzaiko.info kaj ĝis la sekva elsendo ĉe radio Muzaiko!